Kumiddawen ti Department of Justice (DOJ) iti “Blue Notice” idiay Interpol tapno makaala ti impormasyon nu sadino man manen a paset ti lubong nga ayan ita ni Ako Bicol Partylist Representative Zaldy Co.
Kinuna ni Communications Undersecretary Claire Castro nga aramiden daitoy ti ahensya kalpasan a mairaman ti nagan ti mamanday-linteg iti kontrobersya dagiti maanomalya a proyekto ti gobierno, korapsyon, ken mapagduduaa a budget insertions.
Iti Blue Notice Alerts a makidkiddaw iti International Police Organization para ti kanayunan nga impormasyon kadagiti pakabigbigan ken nu sadino ti ayan ti maysa nga indibidwal a sumangsango iti criminal investigation.
Maipalagip nga immuna metten a pinasingkedan ti kampo ni Zaldy Co nga adda isuna sadiay Estados Unidos tapno agpaagas ti sakit na. Pinalubosan met daitoy ni Speaker Bojie Dy agingga inton aldaw ti Lunes, Setyembre 29 nga agawid ditoy Pilipinas ken pagsungbatan dagiti alegasyon kontra kenkuana.
Kadagiti naglabas a lawas ket mapagduduaan dagiti travel reports iti mamanday-linteg agsipud ta tuloy-tuloy iti panagakar na manipud iti maysa a pagilian agturong iti sabali pay.
