LA UNION – Iti tengnga dagiti ilegal nga aramid nga adda pakainaiganna iti Philippine Offshore Gaming Operators (POGOs), impaganetget ni Justice Secretary Jesus Crispin Remulla idi kalman, June 9, a kasarita da dagiti gangannaet ditoy pagilian a suruten dagiti linteg ti Pilipinas wenno sumango dagitoy iti nadagsen ken legal a pannusa.
Inruar ni Remulla iti ballaag kalpasan ti raid iti POGO hub idiay Porac, Pampanga a nakadiskubrian dagiti otoridad kadagiti ebidensya ti torture ken kidnapping.
Binilin ti Justice Secretary iti National Bureau of Investigation (NBI) ken Bureau of Immigration (BI) nga idaulwan ti kaso, mangidatag ti kaso nu kasapolan, ken dagus nga ideport dagiti mapaneknekan nga aglabsing iti immigration laws.
Segun kenni Remulla, nawaya nga awaten dagiti gangannaet nga agtalinaed ditoy pagilian ken mabalin da a tratwen kas bukod a pagilian dagiti gangannaet nu sipupuso da met nga agtungpal iti linteg nga awan ti kondisyon.
Immunan a naipadamag a ti raid idi Miyerkules ket nagresulta iti pannaka-aresto dagiti 158 Chinese, Vietnamese, ken Malaysian nationals.
Naipadamag pay a ti POGO hub ket iman-manehar ti Lucky South 99 Outsourcing.
Imbaga ti Presidential Anti-Organized Crime Commission (PAOCC) a namnamaen da a maka-arestar da pay iti nasurok 1,000 a tattao.
