Mangiruar iti Department of Labor and Employment (DOLE) ti uppat a labor advisories inton Nobyembre tapnu maprotektaran dagiti mangmangged kontra iti nakaro a pudot nga ingubuay ti El Niño.
Segun keni DOLE Secretary Francis Tolentino, karaman kadagiti pagad-adalan iti posible a panagsuspindir ti trabaho nu dumanon iti napeggad a lebel iti heat index, kasta metten iti panangipaay ti kompensasyon kadagiti kuwalipikado a mangmangged iti pribado ken pampubliko a sektor a maaddaan ti sakit gapu iti pudot bayat nga agtatrabaho.
Makitaripnong met iti ahensia kadagiti kumpanya ken pannakabagi dagiti delivery riders ken platform drivers tapnu pagsaritaan iti posible a panangpabiit iti trabaho manipud alas-12 ti aldaw agingga alas-3 ti malem, nu sadinno daitoy iti kabaraan nga tiempo.
Karaman pay iti singasing iti panagsuot ti komportable ngem disente a kawes ken panangipatungpal ti staggered working hours wenno panagbalbaliw iti oras ti serrek ken panagawid dagiti empleyado.
Namnamaen ni Tolentino a makitinnulong dagiti employer iti panangipatungpal kadagiti addang tapnu masigurado iti kinatalged ken salun-at dagiti mangmangged.
