Nagdonar ti Department of Science and Technology (DOST) La Union iti baro nga oven kadagiti benepisiario ti “Bakenotan” Sustainable Livelihood Program bayat ti turn-over ceremony a naangay idiay. Ubbog Barangay Hall idi Hunio 2.
Indauluan ni DOST La Union Provincial Director Jonathan Viernes ti pormal a turnover dagiti ramit, nga inawat ni Maria Corazon Orpiano, presidente ti Yummy Tubs Sustainable Livelihood Program Association.
Kasta met a present iti nasao a programa ni Bacnotan Mayor Divine Fontanilla, a nangipeksa iti agtultuloy a suporta ti lokal a gobierno iti pannakapapigsa dagiti livelihood programs iti nasao nga ili. Segun iti mayor, maitipon ti organisasion kadagiti nadumaduma a programa ti lokal a gobierno tapno ad-adda a mapalawa ti gundaway ken pannakipasetda kadagiti aktibidad ti komunidad, pakairamanan dagiti feeding programs ti munisipio.
Karaman ti “Bakenotan” Sustainable Livelihood Program kadagiti gannuat a sinuportaran ti lokal a gobierno manipud kadagiti proyekto a rimmuar iti pannakabigbig ti ili iti Walang Gutom Awards idi 2024.
Kalpasan ti turnover ceremony, nangangay met ti technical working group meeting ti DOST ken ti LGU ti Bacnotan kas panagsagana iti naituding a pannakaipatungpal ti “Handa Pilipinas: Handa Bacnotan” inton Hulio.
Kabayatanna, agtultuloy ti pannakitinnulong ti Lokal a Gobierno ti Bacnotan kadagiti ahensia ti gobierno a mangidanon kadagiti programa a panggepna a palawaen ti panagbiag ken pasayaaten ti kalidad ti panagbiag dagiti umili. (Report by Bombo Ericka)
