LA UNION – Inpasigurado ti Departament of Transportation (DOTr) Sec. Jaime Bautista ti napartak ken naurnos a panaglabas dagiti produkto ken kargamento kadagiti sangladan iti intero a pagilian.
Inbilin ti sekretario iti Philippine Ports Authority (PPA) a siguraduen ti napartak a panaggaraw dagiti produkto manipud kadagiti sangladan agingga kadagiti destinasion tapno nalaklaka ti panagayus dagiti produkto ken saan a ma-stock kadagiti pantalan.
Segun iti sekretario, dakkel ti maitulong ti modernisasion dagiti sangladan tapno mapapartak ti pannakaibiahe dagiti produkto.
Babaen daytoy, kinunana, makissayan met ti gastos iti logistics a makatulong tapno mataginayon ti nababa a presio dagiti produkto a kasapulan a lumasat kadagiti sangladan.
Pinasingkedan ti sekretario a ti napartak a pannakaitulod dagiti produkto kadagiti merkado ken masigurado a makatulong a ma-stabilized ti presyo sadinoman ti pangipanan dagiti nasao a produkto.
Idi 2023, nakaala ti PPA iti P5 billion a cash dividends ti gobierno. Daytoy ket 50% a nangatngato ngem idi napan a tawen.
