Immanamong ni Department of Public Works and Highways (DPWH) Secretary Manuel Bonoan iti panawagan nga ag-leave of absence isuna nu kasapulan apaman a marugianen ti audit kadagiti flood control projects nga imbilin ni Presidente Ferdinand Marcos Junior.
Kasaruno daitoy ti panangibutaktak ni Presidente Marcos iti maikauppat a State of the Nation Address (SONA) na a palpak ken puro laeng sarsarita dagiti flood control projects kalpasan a nakapadas ti nakaro a panaglayus ti adu a lugar ditoy pagilian gapo kadagiti bagyo ken habagat.
Ti sungbat met ni Secretary Bonoan ket para iti panawagan ni Bacolod Lone District Representative Albee Benitez nga agleave lattan isuna nu nangrugin iti imbestigasyon kadagiti nasao a proyekto.
Kinuna ti mamanday-linteg a kas delicadeza ken tapno matulongan a mapreserba ti integridad ti imbestigasyon, ti panag-leave ket wagas tapno maisubli na ti talek iti publiko ken masiguro ti patas ken mapagtalkan a proseso.
Segun kenni Bonoan, nupay awan ti ammo na nu sino iti mangisayangkat ti audit, awan met ti problema kenkuana ken nakasagana isuna nga ag-leave kasta met nga ur-urayen na laengen ti direktiba iti presidente.
