Dismayado ken nakapungtutan ni Department of Education Secretary Sonny Angara iti arigna saan a panangprayoridad ti Department of Public Works and Highways iti panangipatakder kadagiti classrooms.
Kasaruno daytoy iti rebelasion nga 22 classrooms laeng iti naipasdek manipud ti target a nasurok 1,000.
Segun kenni Angara, arigna naay-ayo dagiti sumagmamano nga opisial ti DPWH kadagiti flood control projects a rason tapno saan a maipaayan ti umdas nga atension ken pondo dagiti proyekto pang-edukasion.
Maibasar iti datos, dandani agdoble idi napalabas a tawen iti pondo para kadagiti proyekto ti flood control, bayat nga agtaltalinaed a kurang iti alokasion ti education sector.
Gapo iti kinakurang dagiti pasdek ket rinibo nga estudyante iti agtultuloy nga agsisinniksik kadagiti classrooms a saan nga maiyannatup ti kaadoda, ken sumagmamano pay dagiti agan-anos nga agklase kadagiti sirok ti karo wenno makeshift classrooms.
Nagpanawagan ni Angara kadagiti ahensia ti gobierno nga urnusen iti alokasion ti pondo, maibasar iti pagkasapulan ti umili kas iti sektor ti edukasion.
Maysa kadagiti kangrunaan a rason ti agtultuloy a backlog iti panangipasdek kadagiti classrooms ket gapo iti anomalya ti DPWH partikular iti nalaos a panaggastos kadagiti flood control projects.
Kabayatanna, target na a suktan iti sistema a saan laeng nga DPWH iti maikkan ti bileg nga agaramid ti DepEd classrooms.
Malaksid ditoy ket tarigagay na met nga iraman dagiti local government units, probinsia, siyudad ken first class municipalites ngan addaan ti kabaelan na a mangaramid ti classroom.###
