Nagpanawag ti Department of Public Works and Highways (DPWH) iti Bicameral Conference Committee nga isubli iti naikissay a P45 billion manipud iti proposed budget para iti nasurok-kumurang 10,000 a proyekto inton 2026.
Segun kenni Public Works Secretary Vince Dizon, posible a saan nga naan-anay a maipatungpal dagiti proyekto no saan a maisubli iti pondo.
Inlawlawagna nga iti pannakaisubli ket saan na kayat a sawen a makissayan iti pondo ti tunggal proyekto.
Nagtaud daytoy iti panangusar ti Senado iti narebisar a Construction Materials Price Data (CMPD) kas basaran ti across-the-board cut.
Impaganetget ti ahensia, rumbeng a maipatungpal daytoy iti per-project basis gapu ta nagduduma iti presio dagiti materiales a nakadepende iti lokasion.
Nagbalin a nabara iti diskusion kalpasan a tinakderan ti Senado dagiti inkissayda, bayat a nagballaag dagiti sumagmamano a manmanday-linteg ti Kamara a mabalin a maaramid kas unimplementable dagiti proyekto nga agbalor ti agarup P400 billion.
Kenuna ti Senado, mabalin nga ipatungpal ti ahensia dagiti proyekto no mabaliwan iti sakop kas maitunos naaprobaran a pondo.
Inlawlawag ti sekretario a suroten ti ahensia iti desision ti Kongreso ken saanen nga usaren iti nagkauna a presio dagiti construction materials.
Dagiti nasao a pannakakissay iti budget ket kasaruno ti flood control scandal a natakuatan nga adda dagiti sumagmamano a proyekto ti DPWH nga overprized wenno substandard.
Kabayatanna, suportado ni Presidente Ferdinand Marcos Jr. iti kiddaw ni Department of Public Works and Highways (DPWH) Secretary Vince Dizon nga isubli iti naikissay a ₱54 billion iti pondo ti ahensia, gapu ta maaramat daytoy para iti implementasion ti agarup 10,000 nga proyekto.
