Nagresponde dagiti kameng ti City of San Fernando Police Station iti naipadamag nga aksidente ti kalsada a napasamak iti kawatiwatan ti Pennsylvania Avenue, Barangay Madayegdeg, Ciudad ti San Fernando, La Union iti agarop alas kwatro ti parbangon ti Enero 17, aldaw ti Sabado.
Ti aksidente ket mainaig iti maysa a motorsiklo a minaneho ni Warren Glenn III Labajo Tiller, 32-anyos, awanan asawa, maysa nga executive chef a residente ti Barangay Ili Sur, San Juan La Union; ken ti kotse a nakarehistro ti sabali a nagan a minaneho ni Albert Gregorie Valle Silos, 34-anyos, awanan metlaeng ti asawa, maysa a call center agent a residente ti Barangay Pandan, Bacnotan, La Union.
Ni Tiller ket naka-imet ti professional driver’s license bayat nga awan met iti naipakita a lisensya ni Silos nga ti lugan a minaneho na ket nakanagan kenni Lloyd Michael C. Rivera.
Maibasar iti imbestigasyon, sakbay iti insidente ket agpada a naka-parada dagiti dua a lugan iti bakante a lote kaabay ti maysa a club a masarakan idiay Mabini Street, Barangay Catbangen, ditoy Ciudad ti San Fernando. Aksidente a nasagid ti kotse iti motor kabayatan ti panag-reverse wenno panag-atras ti driver isu a nakagun-od daitoy iti saan pay a masinunuo a gatad ti perdisyon. Dagiti dua a driver ket nagtulagen nga umuna a risuten ti problema iti istasyon ti pulis.
Nupay kasta, idi agturong kuma dagitoyen iti istasyon ket napartak a kimmabig a timmakyas iti kotse ti agpa-Daya a direksyon agingga a nadungpar na iti solar light post idiay Tomb of the Unknown Soldier wenno nalatak iti awag a “Monumento” kasta met iti road sign iti center island iti isu metlaeng a kalsada.
Gapo iti aksidente ket nadadael ti sangwanan a paset ti kotse ken naiturong sadiay City Health and Wellness Center ti driver para ti medikal a pannakataming sakbay a naiyakar iti opisina ti kapulisan para ti umiso a disposisyon na.
Kabayatanna, natalged metten iti kasasaad daitoy a natakuatan ket adda iti impluwensya ti nasanger idi napasamak ti insidente.
