LA UNION – Inarestar dagiti otoridad iti insayangkat da nga anti illegal drug buy bust operation idiay Barangay Concepcion, Rosario, La Union iti maysa a bus driver ken conductor daytoy, kalpasan a maaktuan dagitoy nga aglak-lako ti iligal a droga.
Dagiti suspek ket nabigbig nga isuda Marlon Artajos, 39, addaan asawa, bus driver, residente ti Barangay Santiago Norte, Caba, La Union ken Louie Juloya, 25, baro bus conductor, ken residente ti Barangay San Eugenio, Aringay, La Union.
Insayangkat ti PDEA-Region 1 ken Rosario Police Station iti operasyon pasado alas 3:00 ti malem idi kalman.
Nagresulta daytoy iti pannaka-kumpiskar iti dua a heat sealed transparent plastic sachet ti maipagarop a shabu, maysa a (1) pidaso ti P500.00 marked money, ken dua a (2) celfone.
Dagiti nasao a droga ket agdagsen iti 0.087 grams ken addaan ti DDB value a P1,000.00
Dagiti dua a suspek ket nakatuding a maidatagan ti kaso a panaglabsing iti RA 9165 wenno Comprehensive Dangerous Drugs Act.
