LA UNION – Arestado iti maysa a jeepney driver ken ti maysa a pahinante daytoy kalpasan a nadiskubre dagiti otoridad a nagkarga dagitoy ti nagduduma a klase ti kayo nga awan met ti maitutop a papeles na, banag a maikonsidera nga illegal logs.
Naarestar dagitoy iti insayangkat nga Oplan Sita ti Burgos Police Station idiay Barangay Caoayan, Burgos, La Union kalpasan a nakaawat da ti impormasyon manipud iti maysa a concerned citizen.
Nabigbig dagiti suspek nga isuda, Benjie Aberin,43, driver ti jeep, residente ti nasao a lugar ken Virgo Dinangan, 28, baro, residente ti Old Poblacion, Burgos, La Union.
Kinumpiskar dagiti otoridad iti 275.85 bd. ft. ti kayo a mahogany ken 98 bd. ft. ti kayo a gimilina, ken mapatta-patta nga agbalor ti aganay P3,000.
Dagiti suspek ket sumangsango iti kaso a panaglabsing ti P.D. No. 705 wenno “Revised Forestry Code of the Philippines.”
Kabayatanna, dagiti nakumpiskar nga illegal logs ket naipasidong iti custodiya ti Burgos Police Station.
