LA UNION – Arestado iti maysa pay a maibilbilang a drug group leader ditoy La Union iti inwayat a search operation dagiti otoridad iti pagtaengan ti subject person idiay Barangay Salingcob, Bacnotan, La Union.
Iti suspek ket nabigbig iti nagan a Bolacan Orancaya, 50-anyos, addaan asawa, residente iti nasao a lugar.
Immuna ti daytoy, sinukimat ti raiding iti pagtaengan ti suspek idiay Barangay maiyannurot iti search warrant nga impaulog ni Presiding Judge Jeovannie OrdoÑo ti MTC idiay Bacnotan, La Union.
Kas resulta iti search operation nga insayangkat ti Bacnotan PNP kas lead unit, PDEA Reg. 1, La Union Provincial Mobile Force Company, nakakumpiskar da iti siyam (9) a sachet ti mapapati a shabu a naikabil iti case ti driver’s license iti suspek ken dadduma pay a drug paraphernalia.
Ginandat na pay ti aglibas a nagturong iti kabantayan idi sumangpet ti raiding team ngem naarestar met laeng iti nairut a hot pursuit operation dagiti otoridad.
Iti eksklusibo a pannakiuman ti Bombo Radyo La Union kenni Police Capt. Virgilio Cruz, agdama a hepe ti pulisiya idiay Bacnotan, La Union kinuna na a siguden a naaresto iti suspek idi August 22, 2016 nga adda met laeng pakainaigan na iti iligal a droga ngem nakapag-piyansa.
Naamwan nga innem agingga iti pito dagiti miyembro ti nasao nga ORANCAYA DRUG GROUP agraman iti lider ken natiliw metten dagitoy iti napal-palabas nga operasyon ngem nakapag-piyansa dagitoy.
Iti agdama, sumangsango manen ti drug group leader iti kaso a panaglabsing iti R.A. 9165 .
