LA UNION – Naidatagen idiay piskalya ti kaso a panaglabsing iti Comprehensive Dangerous Drugs Act kontra iti maipagarup a drug pusher a naaresto idiay Barangay Sagayad, syudad ti San Fernando, La Union.
Nabigbig ti suspek a ni Wilbert Rowan, 18, residente iti syudad.
Naammuan ti Bombo Radyo kenni LtCol. Orly Pagaduan, hepe ti San Fernando City Police Office, ti suspek ket nabayagen a masipsiputan gapu iti aramidna nga addaan ti pakainaigan iti iligal a droga.
Nakompiskar manipud iti ikot ni Roan iti dua a sachet a naglaon iti maatap a marijuana ken P500 bill a buybust money.
Kabayatanna, inaklon ni Rowan nga aglaklako daytoy iti marijuana.
Nadakamat iti suspek a maysa a saanna nga innaganan a personalidad iti agipalpalako kenkuana iti droga kadagiti gagayyemna.
