(Update) LA UNION – Imbilin ni C/Supt. Romulo Sapitula, Director ti Police Regional Office-1 (PRO-1), kadagiti tauhanna a mangisayangkat iti ballistics examination ken cross matching iti nakompiskar a cal .45 a paltog manipud iti napapatay a maatap a drug pusher idiay ili ti San Vicente, probinsya ti Ilocos Sur.
Binigbig ti San Vicente Police ti nasao a drug suspect a ni Tyron Janus Forges, 30, residente ti Barangay Poblacion ti nasao nga ili.
Naammuan ti Bombo Radyo manipud iti PRO-1, kayat a maammuan ni C/Supt. Sapitula no adda iti pakainaigan ni Forges kadagiti dadduma pay a krimen a napasamak iti Ilocos Region.
Immuna iti daytoy, maipagarup a limmaban ti suspek kadagiti pulis a mangisaysayangkat ti buy-bust operations idiay ili ti San Vicente agarup alas-10:50 ti bigat idi kalman, August 23, 2018.
Intutong dagiti pannakabagi ti linteg idiay ospital ti nasugatan a ni Forges, ngem nauyos met laeng ti biagna.
Malaksid iti paltog a kukua ti suspek ket karaman kadagiti nakompiskar manipud iti salwadna ti lima a sachet a naglaon iti maatap a shabu, P2,500 a marked money ken maysa a cellular phone.
Kabilang met kadagiti naitugot a banag nga agpaay kas ebidensya idiay police crime laboratory dagiti narekobre a naduma-duma a kita iti kapsula ti bala iti paltog manipud iti nakapasamakan ti engkwentro tapno maipasidong iti panangammiris. (Absalom Flores)
