LA UNION – Natay ti maipagarup a drug pusher kalpasan a limmaban daytoy kadagiti pulis iti naisayangkat a buy bust operation idiay Barangay Baroro, ili ti Bacnotan, La Union.
Napasamak ti insidente agarup alas-9:00 idi rabii.
Nabigbig ti napapatay a drug suspect a ni Rodante Acosta, 32, newly identified drug pusher, ken residente ti Barangay Lettac Norte, Santol, La Union.
Base iti nakalap nga impormasyon ti Bombo Radyo La Union, maipagarup nga immuna a nagpaputok iti paltog ti suspek idi a madlawna a pulis iti katransaksyon daytoy.
Bimmales met iti putok dagiti nagrespode a pulis ken natirwan ti suspek a nagbanag ti pannakatay daytoy.
Narekobre manipud iti crime scene ti maysa a cal .45 a paltog, maysa a magazine nga addaan iti tallo a bala, siyam a plastic sachet a naglaon iti maatap a shabu ken P1,000 bill a buy bust money.
Iti agdama, adda iti maysa a punerarya ti bangkay ti nasao a drug suspect.
