LA UNION – Inaklon iti maysa a mister nga aglaklako ken sigud nga agus-usar iti maiparparit a droga.
Daytoy ket kalpasan a natiliw iti insayangkat a drug buy bust operation dagiti otoridad nga indaulwan ti PDEA Region 1, idi kalman idiay Rufina Subdivision Brgy. Parian, San Fernando City, La Union.
Nabigbig iti suspek a ni Bribon Hernan, 41-anyos, residente ti nasao a lugar.
Ti nasao nga operasyon ket nagresulta iti pannaka-kumpiskar manipud iti ikot ti suspek iti pakabuklan a dua a heat sealed transparent plastic sachet iti maatap a shabu, maysa a cellphone, maysa a motorsiklo ken P1,000 a buy bust money.
Kinumpirma met dagiti otoridad a pusher ken user iti suspek.
Kaso a panaglabsing iti RA 9165 wenno Comprehensive Dangerous Drugs Act of 2002 ti maidatag kontra iti suspek.
Iti met pannakiuman ti Bombo Radyo La Union kenni Barangay Kapitan Philip Cañeda, kinuna na a nasayaat a natiliwen iti nasao a drug personality.
Napaliiw pay ti kapitan nga idi panawen a nairut ti quarantine ket masansan a mangala ti suspek iti quarantine pass, a posible kunana nga us-usaren na iti iligal nga aktibidad daytoy.
Imbatad ni Cañeda a tarigagay na nga iti kabiitan a panawen ket maideklara metten a drug cleared iti masakopan na a barangay.
