Personal a nagturong idiay Banga, South Cotabato ni DSWD Secretary Rex Gatchalian idi kalman tapno ammuen iti kasasaad dagiti biktima ken pamilya ti pammaltog idiay Banga National High School idi Setiembre 18.
Segun ti ahensia, imbilin ni Gatchalian iti panangdutok ti taggaysa a social worker iti pamilya dagiti pimmusay ken dagiti naospital tapno masigurado iti agtultuloy a suporta ken ayuda.
Nangitukon met iti ahensia ti pinansial a tulong kadagiti nadangran ken pamilya dagiti pimmusay, kasaruno ti direktiba ni Presidente Ferdinand Marcos Jr. a mangited ti dagus a suporta kadagiti apektado.
Kabayatanna, nasuspendir ita nga aldaw ti Lunes, Setiembre 21, iti face-to-face classes iti amin a lebel idiay Banga ken Norala, bayat nga impatungpal met ti Surallah iti suspension manipud elementaria agingga senior high school, kas panagannad kasaruno ti insidente.###
