LA UNION – Nainget iti isaysayangkat ita nga inspeksyon dagiti kameng ti DTI La Union kadagiti naduma duma a pagtagilakwan ti Christmas Lights ditoy lokalidad, tapno masiguro a sertipikado ken natalged nga usaren dagiti produkto.
Iti pannakiuman ti Bombo Radyo La Union kenni DTI La Union Provincial Director Merlie Membrere, nangisayangkaten iti consumer protection division ti DTI La Union iti onsite inspection iti naduma-duma a pagtagilakwan ditoy syudad ti San Fernando, idiay ili ti Agoo, Aringay, San Juan, ken Bacnotan.
Kangrunaan a kinita dagiti kameng ti DTI nu adda met laeng iti nakaikabil a PS mark wenno Philippine Standard mark ken ICC sticker wenno ti maaw-awagan nga Import Commodity Clearance (ICC) kadagiti produkto kangrunaanna dagiti Christmas lights.
Kinapudno na, napintas iti nagbalin a resulta iti naisayangkat nga inspeksyon agsipudta awan ti natiliw a naglabsing wenno kaipapanan daytoy, a compliant dagiti vendors.
Kabayatanna, nupay agtaltalinaed iti pandemya gubuay ti Covid-19, napaliiw ti DTI nga adu latta dagiti gumatgatang kadagiti nasao a produkto.
Ngem ballaag ti ahensiya nga agtultuloy ti isayangkat da nga inspeksyon kadagiti produkto a christmas lights kadagiti saan da pay a nabisita nga ili ditoy probinsiya.
