Inyanunsio ti Department of Trade and Industry (DTI) La Union ti panangisayangkatda ti 2026 Balik Eskwela Diskwento Caravan a mangipaay kadagiti nagannak, estudiante, mannursuro ken dadduma pay a konsumer iti nalaklaka a gatad ken nasayaat a kalidad dagiti produkto kas panagsagana iti pananglukat ti klase inton Hunio 8, 2026.
Babaen ti caravan, mabalin a makagatang iti publiko dagiti grocery items, school supplies, school-related merchandise ken sabali pay a produkto iti nababbaba a presio manipud kadagiti sumrek a distributors ken lokal a micro, small and medium enterprises (MSMEs).
Segun iti DTI La Union, iti aktibidad ket naggapu iti panggep a tulungan dagiti konsumer a makaala dagiti kangrunaan a kasapulan ken ramramit para iti panag-eskuela iti makabael a presio, bayat a mapagtalkan iti kalidad dagiti maipapaay a produkto.
Karaman kadagiti maiparang iti caravan dagiti Basic Necessities and Prime Commodities (BNPCs), school supplies, school-related merchandise, ken dagiti lokal a produkto a naaramid iti Probinsia.
Mangrugi iti caravan inton Hunio 1 idiay Bacnotan National High School iti Poblacion, Bacnotan. Inton Hunio 2, maidaulo met daytoy idiay Sinapangan National High School iti Tallipugo, Balaoan ken Luna National Vocational High School iti Alcala, Luna.
Inton Hunio 3, maangay iti aktibidad idiay Northern Naguilian National High School iti Gusing Norte, Naguilian, ken maileppas inton Hunio 4 idiay Tubao Central School iti Francia West, Tubao.
Amin a lugar ti caravan ket maangay manipud alas-8:00 ti bigat agingga alas-3:30 ti malem.
Pinalagip ti DTI La Union iti publiko a gundawayen dagiti diskuwento ken suportaran dagiti lokal a MSMEs a paset iti daytoy a programa para iti mas nalaka a panagsagana iti umay a panaglukat ti klase. (Report by Bombo Jordan)
