Nangisayangkat ti Department of Trade and Industry (DTI) La Union iti courtesy visit kadagiti Local Government Units (LGUs) ti Bauang, Caba, Aringay, ken Balaoan idi Marso 16, 2026.
Daytoy nga addang ket kas paset ti nainget a kampania ti ahensia tapno mapatibker ti relasion, koordinasion, ken kooperasion kadagiti lokal a gobierno nga agturong iti ad-adda a nairaman ken natalged a panagdur-as ti ekonomia iti probinsia.
Ti nasao a panagbisita ket indauluan ni OIC Provincial Director Victoria A. Ordoño, kadua da Michelle M. De Jesus, ken Marissa T. Nonesa.
Kabayatan ti panagtataripnong a naangay iti tunggal LGU, napagsasaritaan dagiti napateg a programa, proyekto, ken serbisio nga ituktukon ti DTI a naipamaysa iti panangpapigsa kadagiti micro, small, and medium enterprises (MSMEs), panangpasayaat iti kasasaad ti negosio, ken panangsalaknib iti pagimbagan dagiti konsumer.
Karaman kadagiti kangrunaan a programa a naiparang ket ti Pangkabuhayan sa Pagbangon at Ginhawa (PPG), a mangipapaay iti tulong iti pagbiag, alikamen, ken panagsanay kadagiti agtagikua iti babassit a negosio, nangruna dagiti naapektaran iti nadumaduma a krisis.
Napagsasaritaan pay ti Bantay Bayanihan sa Merkado (BBM), maysa a gannuat a panggepna a papigsaen ti panangmonitor iti presio ken suplay dagiti kangrunaan a tagilako, malapdan ti panagkusit a panagtagilako, ken panangtaginayon iti patas ken nalinteg a merkado babaen ti aktibo a pannakipaset ti komunidad ken LGU.
Mainayon pay, inbinglay pay ti DTI ti dadduma pay a serbisio kas iti tulong iti panagrehistro iti negosio babaen ti Business Name Registration System, entrepreneurship training, digitalization programs para kadagiti MSME, ken consumer education measures tapno maipakaammo ti publiko kadagiti karbengan ken responsibilidadda kas consumers.
Kabayatan ti diskusion, inyebkas dagiti lokal nga opisial ti suportada kadagiti programa nga indatag ti DTI, ken napagsasaritaan ti napigpigsa a panagtinnulong iti pannakaipatungpal dagiti proyekto a makatulong a mangtignay iti lokal nga ekonomia.
Naipaganetget met ti kinapateg ti data sharing, regular coordination, ken joint monitoring activities tapno ad-adda nga epektibo ti pannakaipatungpal dagiti programa iti bukodda a hurisdiksion.
Segun ti DTI La Union, daytoy a courtesy visit ket pammaneknek iti agtultuloy a panagkumitda iti panangitandudo iti inclusive development, panangpapigsa kadagiti lokal nga industria, ken panangpabileg kadagiti komunidad.
Babaen ti natibtibker a singgalut kadagiti LGU, manamnama ti ad-adda nga episiente ken nalawlawa a pannakaipaay ti serbisio nga agresulta iti pannakaitan-ok ti panagbiag ken kalidad ti biag ti tunggal umili iti La Union. (Report by Bombo Ericka)
