Nagpakdaar ti Department of Trade and Industry (DTI) iti publiko iti panaggatang dagiti regalo online para ita a Valentine’s Day gapu kadagiti ngumatngato a kaso ti shopping scam.
Segun ti ahensia, umad-ado ken agbalbalin nga agresibo dagiti saan a rehistrado nga online seller a mangidiay-diaya ti “love gifts” a saan a sigurado ti kalidad ken proteksion ti gumatgatang.
Impaganetget ti DTI a rumbeng a gumatang laeng kadagiti lehitimo a platform nga addaan ti DTI trustmark tapno maliklikan ti panangloko.
Nagpakdaar met ti Philippine National Police (PNP) ken Scam Watch Pilipinas iti panagraira ti “love scams” iti social media ken kadagiti dating apps.
Nailista ti PNP iti 54 a kaso ti love scam idi 2025, 75 idi 2024, ken innem a kaso manipud Enero aginggana Pebrero ita a tawen.
Maipagarup nga agar-aramat dagiti scammer ti artificial intelligence tapno mangpartuat ti peke a ladawan, video call, ken scripted a saritaan tapno allilawen iti biktimada.###
