Sumango ita nga aldaw dagiti dua nga auditor ti Commission on Audit (COA) kas testigo iti impeachment trial ni Bise Presidente Sara Duterte tapno mangited ti testimonia mainaig ti panag-audit iti confidential funds ti Office of the Vice President (OVP) ken Department of Education (DepEd).
Manamnama a paneknekan da sigud nga Intelligence and Confidential Funds Audit Office state auditor Roderick Wamil ken supervising auditor Celine May Del Campo seknan iti audit process ken dagiti natakuatan ti COA iti panagusar ti nasao a pondo.
Segun kenni House lead prosecutor Rep. Gerville Luistro, ipamaysa ti prosekusion iti proseso ti panag-audit ken dagiti Notice of Disallowance nga inruar ti COA mainaig dagiti maipagarup a kuestionable a panaggastos iti confidential funds.
Kalpasan ti testimonia dagiti dua nga auditor, nakatudong met a sumango ni Marivic Pareja, director ti Legislative Information Resources Management Department ti House of Representatives.
Immunan a nagtestigo dagiti retirado a LandBank branch managers nga isuda Violeta Constantino ken Nenita Camposano maipanggep iti panag-encash ti Treasury checks nga aggatad ti ₱612.5 million para iti OVP ken DepEd idi sekretario pay ni Duterte iti ahensia. Paset daytoy iti ebidensia nga isango ti prosekusion mainaig ti Article I ti impeachment complaint a mangtaltalantan iti maipagarup a biddut a panagusar ti confidential funds.
Impaganetget ti prosekusion nga iti liquidation dagiti sumagmamano a confidential funds ket napakuyogan dagiti acknowledgement recipts a maipagarup a naglaun dagiti nagan a saan nga agtunos iti rekord ti Philippine Statistics Authority, karaman ti “Mary Grace Piattos,” “Milky Secuya,” ken “Kokoy Villamin.” Nadakamat met a nangiruar iti COA dagiti Notice of Disallowance mainaig dagiti kuestionable a panaggastos.
Kabayatanna, imbaga ni House prosecution spokesperson ken Lanao del Sur Rep. Zia Alonto Adiong nga agtaltalinaed a sakop ti audit ti COA iti confidential ken intelligence funds ken rumbeng daytoy a sumurot iti agdama a linteg ken regulasion.###
