LA UNION – Dua a lugar ditoy probinsiya a La Union iti nakapasidong iti “yellow category” ita nga eleksiyon.
Pakaibilangan ditoy iti siyudad ti San Fernando ken idiay ili ti Agoo.
Iti kategorya a duyaw wenno yellow, ket kaipapanan a dagitoy a lugar ket adda pakasaritaan na ti kinadamsak nga adda pakainaigan na iti eleksiyon wenno rinnisiris iti pulitika.
Ngem segun kenni Police Major Bernabe Gallardo, deputy chief-of-police idiay Agoo, La Union natalna itan iti ili nga Agoo, a saanen a kas iti napal-palabas nga eleksiyon.
Iti Election 2022 ket dinasig ti Comelec kadwa da iti PNP ken AFP dagiti election areas of concern iti uppat a kategorya: Green, Yellow, Orange, ken Red.
Iti kategorya a berde ket dagiti lugar nga awan iti pagdanagan iti seguridad; duyaw met para kadagiti lugar nga adda history na ti kinadamsak nga election related wenno nabara ti pulitika iti baetan dagiti agkakalaban a pulitiko; iti kategorya nga orange ket para kadagiti lugar nga adda iti presensiya iti terorista a grupo wenno pangta iti armado a grupo; idinto nga iti Red category ket kaipapanan a dagiti lugar ket kasapolan a maipasidong iti kontrol ti Comelec tapno malapdan iti posible a panagsaknap ti kinadamsak.
