Arestado iti dua nga indibidwal a maibilang a high-value target kabayatan ti buy-bust operation dagiti otoridad idiay Barangay Cupang, Santo Tomas, La Union.
Nagresulta pay daytoy iti pannakakumpiskar iti aganay 100 a gramo ti maipagarop a shabu, nga aggatad iti ₱680,000 .
Nagtitinnulong a nangisayangkat iti operasyon dagiti operatiba ti Special Operations Unit 1 ti PNP Drug Enforcement Group, Santo Tomas Police Station, dagiti drug enforcement ken intelligence unit ti La Union, ti Regional Police Drug Enforcement Unit 1, ken ti Philippine Drug Enforcement Agency wenno PDEA Region 1.
Ti nasao nga operasyon ket paset ti agtultuloy a kampanya dagiti law enforcement agencies kontra iti ilegal a droga.
Dagiti nakumpiskar a maipagarop nga ilegal a droga ket naisubmitir iti Regional Forensic Unit 1 para iti pannaka-amiris ken makumpirma ti pudno a komposisyon .
Sumangsango dagiti suspek iti kaso a panaglabsing ti Republic Act No. 9165 wenno Comprehensive Dangerous Drugs Act of 2002.
