Inuli dagiti dua nga indibidwal iti tuktok ti ‘spire’ iti Empire State Building, New York City, tapno iwayat iti banner para ti panawagan iti sangalubongan a kinakapia, sakbay a nagtungpal iti stunt da iti marriage proposal.
Nakakawes da iti sleeveless black outfits bayat a nakaiggem iti antenna spire, asideg ti nalabagga a silaw iti tuktok nga addaan iti kangato a 1,454 a kadapan wenno 443 a metro manipud iti kalsada ti Midtown Manhattan.
Nakasurat iti banner iti : “When the power of love beats the love of power the world knows peace.”
Saan pay a masinunuo dagiti otoridad nu sino dagiti indibidwal ken nu kasatno da a nakadanon iti tuktok ti pasdek.
Agarop 12:30 p.m., nagpuesto da iti antenna structure, nagparintumeng ti maysa kadakuada ken nagpropose sakbay a naginnungngo ken naginnarakop.
Im-imbestigaran paylaeng iti New York Police Department (NYPD) dagiti kanayunan a detalye iti nasao a pasamak.
