LA UNION – Naluktanen iti dua pay a kanayunan a mega vaccination site ditoy probinsya ti La Union.
Masarakan dagitoy iti La Union Medical Center idiay ili ti Agoo ken iti Bacnotan District Hospital.
Daytoy ket iti tarigagay nga agtultuloy ken napaspas ti panagbakuna dagiti indibidwal a karaman ti A1 wenno dagiti frontliners ken healthcare workers, A2 wenno senior citizens ken A3 priority group wenno dagiti indibiduwal nga addaan ti commorbidities.
Iti agdama, addan ti 3 a mega vaccination site ditoy probinsya.
Impaganetget ti Provincial Government a tunggal mega vaccination site ket adda naituding a naurnos a vaccine stations tapno mas napaspas iti proseso ti panagbakuna kadagiti maseknan nga umili.
Addaan pay dagitoy iti naurnos a ventilation iti uneg ti nadakamat a pasilidad tapno masiguro a natalged iti publiko nangruna dagiti senior citizens ken addaan ti commorbidities.
Iti tunggal mega vaccination site ket addaan pay ti catchment areas.
Maipalagip nga immuna a nalukatan ti mega vaccination site iti Father Burgos Gym ti SLC ditoy syudad nga addaan ti kabaelan na a mangbakuna kadagiti prayoridad nga indibidwal manipud syudad ti San Fernando agrama dagiti indibiduwal manipud ili ti Bauang, Naguilian, Bagulin ken Burgos, La Union.
Mabalin met nga agpabakuna iti LUMC idiay Agoo dagiti residente nga aggapo iti abagatan a paset ti probinsya idinto a mabalin met nga agpabakuna idiay Bacnotan District Hospitak dagiti residente manipud San Juan ken dagiti aggapo iti amianan a paset iti probinsya.
