LA UNION – Natagtagbat ti dua a tanod iti baet a ginandatda laeng nga anawaen ti maysa a nabartek a lalaki idiay Barangay Guinaboran, Balaoan, La Union.
Nabigbig dagiti biktima a da Willie Opiña, 53-anyos ken Mariano Ople, 60-anyos.
Maibasar iti inisial nga imbestigasion ti pulisia, naimatangan dagiti dua ti panagpukka-pukkaw ti suspek a ni Gregorio Oriente, 53-anyos, iti barangay road ken mangkarkarit iti apa.
Ditoy met a pinanggep nga atipaen da Opiña ken Ople ni Oriente ngem nagkedked daytoy ken nagpangta a paltoganna dagiti dua.
Sinurot ngarud dagiti biktima ti suspek iti balayna ngem kellaat nga inruarna ti buneng kasaruno ti panangtagtagbatna kadagiti dua.
Dagus met a naitaray dagiti tallo iti ospital bayat a maim-imbestigaran pay laeng ti pasamak.
