Mamati ti Malacañang a kayat laeng nga ilikaw dagiti tagasuporta ni Bise Presidente Sara Duterte iti isyu ti impeachment, isu ta mangipila da met ti impeachment complaints maibusor kenni Presidente Ferdinand Marcos Jr.
Imbutaktak ni Palace Press Officer Undersecretary Claire Castro kas maibasar iti impormasion nga imbinglay ti maysa a mammanday-linteg, dagiti supporters ti pamilya Duterte iti adda ti likudan iti plano nga impeachment complaint kontra ti Presidente.
Impasigurado ni Castro a nakasagana ni Presidente Marcos a sanguen iti reklamo ken raraemen na iti Konstitusion ken dagiti proseso nga intuding ti linteg.
Awan ti basaran iti alegasion ti breach of public trust mainaig iti maipagarup a panagpermana iti General Appropriations Act (GAA).
Impaganetget ti Palace official a saan a nagtakaw ti kuarta iti Presidente ken isuna pay iti nangibilin ti imbestigasion kadagiti maanomalya a flood control projects a posible a nagtaudan ti korapsion, ken awanan daytoy ti isyu kas ti “Mary Grace Piattos”.
Agtalek ti Palasyo a saan nga agabante iti impeachment kontra iti Presidente.
Iti agdama, awan pay ti pormal nga impeachment complaint isu nga awan ti rumbeng a pagsaganaan na.
Impaganetget ni Castro nga iti impeachment ket maysa a seryoso a proseso ti konstitusion ken saan a rumbeng nga usaren kas panangbutbuteng wenno pang-media.
Inallukoy na met dagiti kritiko nga unaen pay a sungbatan dagiti isyu a sangsanguen ti supsuportaranda a lider.###
