Karaman ni tennis star Alex Eala ken ni two-time Olympic gold medalist Carlos Yulo kadagiti kangrunaan a pambato ii Pilipinas para iti 20th Asian Games idiay Aichi-Nagoya, Japan, a naikeddeng manipud Setiembre 19 agingga iti Oktubre 4.
Nasurok a 400 nga atleta iti nakatuding a makipaset iti nadumaduma nga isports, pakairamanan da Eala, Yulo, jiu-jitsu champion Annie Ramirez, pole vaulter EJ Obiena, BMX rider Daniel Caluag ken ti Gilas Pilipinas men’s basketball team. Karaman pay iti delegasion ti Alas Pilipinas men’s and women’s volleyball teams ken dagiti golfers a da Bianca Pagdanganan ken Pauline del Rosario.
Panggep ni Eala a pasayaaten iti dua a bronze medals a nagun-odna iti 2023 Hangzhou Asian Games iti women’s singles ken mixed doubles. Kalpasan ti kampaniana iti US Open, naipamaysa isuna itan iti Asian ken saan a makipaset iti WTA 1000 Beijing Open a kagiddan ti torneo.
Napateg met ti torneo para ken ni Eala gapu ta ti kampeon iti women’s singles ket mabalin a makagun-od iti automatiko a puesto iti 2028 Los Angeles Olympics, a maibasar kadagiti naikeddeng a qualification requirements.
Kabayatanna, agsublinto ni Yulo iti Asian Games kalpasan ti dua a gold medals-na iti Paris 2024 Olympics. Isu ti maysa kadagiti manamnama a gold medalist para iti pagilian iti gymnastics.
Iti napalabas nga Hangzhou Asian Games, nakagun-od ti Pilipinas iti uppat a balitok, dua a pirak ken 12 a bronze medals. Panggep ti delegasion a lab-awan ti nadakamat a medal tally idiay Aichi-Nagoya.###
