Mamati ni sigud nga International Criminal Court (ICC) Judge Raul Pangalangan nga umdasen iti ebidensia nga imparang ti prosecution tapno i-convict ni sigud a Rodrigo Roa Duterte.
Segun ti sigud nga husgado ken nagserbi a dean ti U.P. College of Law, natibker dagiti ebidensya nga inpresenta ti prosecution iti umuna nga aldaw ti hearing, ken umdas daytoy tapno allukuyen dagiti ICC judges.
Sakbay a nangrugi ti panagdingeg ket ninamnama-na nga iparang ti panel dagiti witnesses tapno maipakita iti merito ti kaso, ngem, sinaggaysa dagiti prosecutors dagiti sumagmamano nga ‘specific details’ dagiti kaso a naipabasol kenni Duterte, karaman dagiti video clips a mangipakpakita dagiti kontrobersial a waragawag idi ti sigud a presidente.
Saan met nga impaigid ti sigud nga ICC judge iti posibilidad nga isagsagana ken ur-urnungen pay ti panel dagiti ‘strongest evidence’ wenno kapigsaan nga ebidensya para iti trial proper, no bilang agabante ti kaso manipud iti confirmation stage.
Karaman kadagiti inpresenta ti panel iti umuna nga aldaw ti confirmation hearing ti sigud a presidente ket dagiti video ti panangaklonna dagiti sumagmamano a pammapatay, ken kontrobersial a pammilin iti kangitingitan ti kampania kontra illegal a droga.
Iti nagbalin a waragawag ti senior trial lawyer ti Office of the Prosecutor a ni Julian Nicholls kabayatan ti panagdingeg, kenunana a natibker iti iggem nga ebidensia ti prosecution ken kabaelan ti panel nga i-convict ti sigud a presidente, no agdesision dagiti judges nga ituloy daytoy iti full trial.###
