Dumanonen ti 2,011 dagiti kumpirmado a pimmusay iti Ebola outbreak idiay Democratic Republic of Congo (DRC), bayat nga adda ti 4,381 iti kumpirmado a kaso kadagiti lima a probinsia, segun iti kabaruan a datos dagiti health authorities idi Agosto 11.
Ti outbreak, nga ingubuay ti Bundibugyo virus, ket maibilbilang a kapartakan a nagwaras nga Ebola outbreak iti nasao a pagilian.
Manipud iti umuna a 1,000 a natay, dumanonen ti 2,000 iti bilang da iti uneg laeng ti sumagmamano a lawas, bayat nga agtultuloy a malaplapdan iti containment efforts ti pannakasinga iti panangammo dagiti kaso, armado a riribok, kinakurang dagiti health services ken medical supplies, ken panaggaraw dagiti residente.
Daytoyen iti maika-17 nga Ebola outbreak idiay DRC.
Segun ti World Health Organization (WHO), awan ti licensed vaccine wenno partikular a therapeutic treatment para iti Bundibugyo virus, nupay makatulong iti nasapa a supportive care.
Indeklara met ti WHO idi Mayo 17 iti outbreak idiay DRC ken Uganda kas public health emergency of international concern (PHEIC).
Agtultuloy a mangparparigat iti panangtaming iti kinakurang ti contact tracing, isolation ken dadduma pay nga outbreak-control measures, karaman iti panagduadua dagiti sumagmamano a komunidad kadagiti health worker.###
