Naitandudo manen ni EJ Obiena iti panaglukat ti 2026 season kalpasan a nagun-odna ti balitok a medalya iti Pole Vault ti 2026 Asian Indoor Athletics Championships idi kalman idiay Tianjin, China.
Nagund-od ti two-time Olympian iti top podium spot kalpasan a naka-clear ti 5.70 meters iti umuna nga attempt.
Pinadas nga artapan ni Li Chenyang manipud China ti nasao a kangato ngem napaay daytoy kadagiti tallo a panaggandat, a nakaigapuan ti pananggun-odna ti silver medal kalpasan a maartapan ti 5.60m.
Nakumpleto ni Chen Yang iti podium ti bronze medal kalpasan a na-clearna ti 5.40m.
Nupay iggem ni Obiena ti Asian record a 5.93m, ingkagumaan na nga artapan ti 5.80m, ngem napaay kadagiti amin a 3 attempts.
Dua a lawas sakbay ti Asian indoor meet, nakaaramid met ni Obiena iti nakaskasdaaw a panagparang kalpasan a nadominarna ti International Springer-meeting idiay Alemania, maysa a pammaneknek iti napigsa a pormana iti indoor season.
Sumaruno a pakipasetan ti Filipino Pole Vault Ace iti INIT Indoor Meeting Karlsruhe idiay Germany kas paset ti agsasaruno nga international competitions-na ita a tawen.###
