Nagevacuate dagiti pamilya a naapektaran ti panagbettak ti Bulkang Kanlaon agarop alas-3:00 ti malem idi Kalman.
Segun kenni Office of Civil Defense (OCD) Assistant Secretary Bernardo Rafaelito Alejandro IV, nangipaulog ti direktiba ni Defense Secretary ken National Disaster Risk Reduction Management Council (NDRRMC) Chairman Gilberto Teodoro Jr. iti madagdagos a panagevacuate ken tulongan dagiti residente tapno maliklikan nga adda iti pumusay.
Iti agdama ket madama iti panangevacuate kadagiti residente nga agnanaed iti uneg ti six-kilometer radius ti Bulkang Kanlaon nu sadinno mapatta-patta a dumanon ti 12,000 pamilya wenno 54,000 nga indibidwal ti apektado manipud Western Visayas ken Central Visayas.
Kinunana pay nga activated itan ti Inter-Agency Coordinating Cell a buklen dagiti mangibagi ti Department of Health (DOH), Department of Social Welfare and Development (DSWD), ken Department of the Interior and Local Government (DILG) para iti epektibo a response efforts.
Kabayatanna, pagsagsaganaen met dagiti otoridad para iti worst case scenario iti pasoble a panangipaulog ti Alert Level 4 iti Bulkang Kanlaon.
