Opisial a naawat ti Lokal a Gobierno ti San Juan, La Union dagiti umuna nga emergency supplies ken relief goods a naggapu iti Provincial Government of La Union (PGLU) babaen ti Provincial Disaster Risk Reduction and Management Office (PDRRMO) idi kalman, Hunio 17, 2026.
Paset daytoy ti pinapigsa a prepositioning program ti probinsia a mangipangpangruna iti panangisagana kadagiti kasapulan a ramramit ti tunggal munisipio tapno masiguro iti napardas, naurnos, ken dagus a panangtulong kadagiti umili no adda didigra wenno emerhensia.
Personal nga inawat da Mayor Mariquita P. Ortega ken Municipal Disaster Risk Reduction and Management Officer Gino P. Mabalot dagiti nakuna a suplay para iti umiso a panagidulin ken panangimanehar ti munisipio.
Karaman kadagiti naipatulod iti ili dagiti relief goods wenno non-food items a kas ti 155L stackable storage boxes ken hygiene kits, shelter-grade tarpaulins, jerry cans wenno pagidulinan ti danum a mainum, hygiene kits a naggapu iti Department of Health, family kits a naggapu iti AHA Centre, ken bottled water.
Segun iti lokal a gobierno, dakkel a tulong dagitoy a suplay tapno mapapigsa pay iti kinasagana ti munisipio iti panangsango kadagiti kasapulan dagiti umili ti panawen ti didigra.
Nangipaay met ti naimpusuan a panagyaman iti Lokal a Gobierno ti San Juan iti PGLU gapu iti agtultuloy a suporta ken panangilungalong dagiti programa a mangpapigsa iti kapasidad ti munisipio iti panagsagana ken panagresponde kadagiti didigra. (Bombo Jordan Colcol)
Photo Courtesy:
Municipality of San Juan, La Union – The Surfing Capital of the North
