Maysa a lalaki idiay Baccuit Norte, Bauang, La Union ti pimmusay kalpasan ti panagpakamatay na.
Nabigbig ti biktima a ni John Dave Casallo Libatique, agtawen iti 23, addaan iti live-in partner ken residente ti Baccuit Norte, Bauang, La Union.
Maibasar iti report ti Bauang Municipal Police Station, ken segun ken ni PCpl. Rjay Ofiaza, investigator on case, idi alas12:40 iti parbangon, Pebrero 22, 2023, nadiskobre ti uncle ti biktima a ni Mr. William Christopher Libatique ti biktima a nakabitin nga awananen iti puot.
Nagaramat ti nylon ti biktima ti panagbekkelna iti uneg mismo ti kwarto na.
Dagus met nga inikkat ni Mr. William Labatique ti biktima a nakabitin ken pinadasna daytoy nga i-revive kadwa ni Mr. Rennie Villanueva Libatique nga ama ti biktima.
Dagus met a nagresponde dagiti kameng ti Bauang Municipal Police Station karaman dagiti medical staffs ti Bauang Lying Inn kalpasan a naawatda ti tawag.
Inkagumaan dagiti medical staffs nga ispalen ti biktima ngem napaay dagitoy ken naideklara ti biktima a pimmusay.
Naduktalan iti imbestigasion a sakbay ti insidente, idi alas10:00 ti rabii ti Pebrero 21, 2023, nangngeg ni Sherainee Salahuddin, asawa ni Mr. William Libatique, ti biktima a patayenna ti bukodna a bagi.
Maibasar kadagiti impormasion a nakalap ti pulisya, nagsaba ti biktima iti emotional distress kalpasan ti panagapada iti live-in partner na, ken nakita dagiti pulis a saan a “foul play” ti nasao nga insidente.
