LA UNION – Addaan ti probinsya ti La Union iti kababaan nga employment rate ditoy Amianan a Luzon a dumanon iti 94.6%.
Nupay kasta, nakitaan met iti probinsya ti panagngato kadagiti maad-addaan ti trabaho para kadagiti nagsasaruno a tallo nga tawen agingga 2024 ken nailista ti panagngato a 1.3% manipud idi napalabas a 2023.
Segun iti Employment Rate Map para kadagiti tawen ti 2023 ken 2024 a datos manipud Philippine Statistics Authority – Statistics on Labor Market 2024, ti panagngato ti employment rate ket gapo iti agtultuloy a panagrekobre ti probinsya iti COVID-19 Pandemic ken adu a negosyo iti naglukat manen kasta met a nag-employ kadagiti tattao da.
Kabayatanna, addaan met ti probinsya ti Ilocos Sur iti kangatoan nga employment rate iti 98.7% idi 2024, ngimmato iti 0.9% manipud tawen 2023; napasarunoan daitoy ti probinsya ti Ilocos Norte nga addaan iti 98.4%, bimmaba met ti 0.3% manipud tawen 2023; ken probinsya ti Pangasinan nga addaan ti 95.3% employment rate idi tawen 2024, ngimmato ti 1.4% manipud idi 2023.
Iti agdama, manamnama iti agtultuloy a panagngato ti employment rate ti probinsya ti La Union para ti tawen 2025 gapo iti panaglukat dagiti baro a negosyo a mangigubuay ti panagngato ti oportunidad ti trabaho para kadagiti umili ken kabangibang a probinsya.
