LA UNION – Nakaragsakan ti Department of Labor and Employment (DOLE) Regional Office-1 iti ininot a panagngato iti employment rate ti Ilocos region iti laksid ti mapaspasaran a pandemya.
Iti pannakiuman ti Bombo Radyo La Union kenni DOLE Regional Office-1 Labor Communications Officer Justin Paul Marbella, kinunana a bimmaba ti unemployment rate iti rehiyon base ti kaudian a survey nga insayangkat iti Philippine Statistics Authority (PSA) Regional Office-1.
Maobserbaran kinunana iti ininot a panagsublin ti empleyo wenno trabaho iti rehiyon.
Base iti datos, manipud iti 11.5% nga employment rate idi napalabas nga Oktubre 2020 ket iti first quarter ita a tawen ket bimmaba iti 9.3% ti unemployment rate.
Bayat a ti employment rate ket manipud iti 88.5% ket ngimmato daytoy iti 90.7%.
Dakkel a nakatulong ditoy iti ininot a panaglukat dagiti panggedan ken dagiti naduma-duma nga establishimento.
Adda met kinunana dagiti na-rehire nga empleyado ngem adda met dagiti na-retrenched wenno naikkat iti trabahoda.
Iti agdama kinuna iti opisyal ket agtultuloy dagiti regular a programa iti DOLE tapno matulungan dagiti agkasapulan nga benepisaryo iti katengngaan ti pandemya.
Mangnamnama met ti nadakamat nga opisina a sumayaat iti estado ti empleyo kabayatan iti ininot a panaglukat ti ekonomiya.
Numan pay nagserran dagiti panangipaayda iti assistance kadagiti workers a naapektaran ti pandemya ket agtultuloy kinunana iti panangbirokda iti wagas tapno matulungan dagitoy.
