LA UNION – Naiyatnagen ti Executive Order (EO) No. 41-2020 a mangipalubos kadagiti agindeg iti kabangibang a lugar a sumrek idiay ili ti Rosario, La Union nga adda ti sidong ti General Community Quarantine (GCQ).
Base iti pammilin a pinirmaan ni Rosario Mayor Bellarmin Flores III, mapalubusan a sumrek base iti naituding nga eskedyul dagiti taga Tuba, Benguet; Sison, Pangasinan; Pugo ken Sto. Tomas, La Union tapno aggatang iti kasapulan idiay palengke, makitransaksyon iti bangko, agpataming iti ospital ken dadduma pay a maiiyannurot iti sidong ti EO.
Masurok latta ti color coding kadagiti ikot a quarantine pass dagiti taga-Rosario.
Naipaganetget met a dagiti laeng agtawen ti 21 agingga 59-anyos iti mabalin a makaserrek ti sentro iti ili ken kasapulan nga addaan dagitoy iti ikot a valid Id a mangpaneknek iti edadda.
Kasapulan met nga agtungpal iti social distancing ken agramat ti face mask dagiti mapalubusan.
Kabayatanna, ti ili iti Rosario ket agtaltalinaed ita a COVID-19 free.
