BR LA UNION – Imbilin ti Energy Regulatory Commission (ERC) iti Manila Electric Company (Meralco) nga isubli iti pakabuklan a P9.5 billion kadagiti consumer, a sobra a nakolekta a singir ti koryente idi 2025.
Maibasar iti desisyon ti ERC a napetsaan iti Hulyo 31, daytoy ket kaibatugan ti P0.3449 kada kilowatt-hour (kWh) a maikissay iti bill dagiti kostumer iti las-ud ti innem a bulan.
Agpar-parang iti refund kas naisina nga item iti monthly electricity bill ti koryente ken manamnama a mangrugi iti sumaruno a billing cycle.
Segun kenni ERC Chairperson ken CEO Francis Saturnino Juan, maipatungpal ti refund apaman a maawat ti Meralco ti opisyal a desisyon ti komisyon.
Inlawlawag ti ERC a ti refund ket resulta iti panang-korehir iti panagsingir iti maaw-awagan a “lapsed period” manipud Enero agingga iti Disyembre 2025.
Kabayatan daytoy a panawen, nagtultuloy ti panagsingir ti Meralco babaen ti panangusar iti sigud a naaprubaran a rate bayat nga maur-uray ti pannakaaprubar ti baro a rate iti sidong ti proseso ti rate reset.
Kinuna pay ti ERC a nairaman ti interes iti pakabuklan a refund gapu iti sobra a gatad a nakolekta ti Meralco iti nasao a panawen.
