LA UNION – Nireklamo idiay kwerpo iti pulisya ti sigud a kapitan a maipagarup a nangprobukar iti riribok kontra kadagiti agdama nga opisyal ti Barangay San Joaquin Norte, ili ti Agoo, La Union.
Nabigbig ti suspek a ni sigud a Barangay Chairman Bonifacio Badana Sr. ti nasao a lugar.
Base iti report a nakalap ti Bombo Radyo manipud ti Agoo Police Station, alas:8:50 idi rabii ket limmabas ni Badana idiay sango ti Barangay Hall ken pinagsasawanna iti agkakadakes dagiti agdama a barangay officials.
Maipagarup a ginandat pay ti suspek a dangran ni Kapitan Vicente Sigman Jr., ngem naatipa daytoy dagiti tanod.
Inwasawas pay ti sigud a punong barangay ti maysa a tugaw a nakasugatan ti maysa kadagiti tanod a ni Frank Buatista.
Dagus met a naglibas ti suspek kalpasan iti insidente, kabayatan a naiturong iti ospital ti barangay tanod tapno mataming ti nilak-amna a sugat.
Kabayatanna, ur-urayen iti pulisya ti no pormal a mangidatag iti kaso idiay pisklaya dagiti nadakamat a barangay officials.
