LA UNION – Arestado iti maysa a sigud a Barangay Kagawad ken maibilang a Top No. 6 drug personality iti municipal level idiay Naguilian, La Union iti insayangkat a buy bust operation dagiti otoridad idiay Barangay Bancagan ti nasao nga ili.
Iti suspek ket nabigbig iti nagan a Randy Gurion, 33-anyos, residente ti nadakamat a lugar.
Iti pannakiuman ti Bombo Radyo La Union kenni PMaj Judy Calica, hepe ti Naguilian Police Station, kinuna na a nakakumpiskar da iti dua a plastic transparent sachet a maipagarop a shabu, P500 buy bust money, P1,500, maysa a cellphone, ken motorsiklo a nausar iti iligal a transaksiyon.
Segun kenni Maj Calica, siguden a natiliw ken nabalud iti suspek ken karuruar na laeng iti pagbaludan idi bulan ti Mayo.
Ngem maipagarop nga intultuloy ti suspek iti iligal nga aramid, base iti surveillance nga insayangkat dagiti otoridad.
Kabayatanna, pinaglibakan ti suspek a kukua na iti nakumpiskar a droga ngem aminado nga agus-usar daytoy.
Iti suspek ket sumangsango manen ti kaso a panaglabsing iti Republic Act No. 9165 wenno Comprehensive Dangerous Drugs Act of 2002.
