LA UNION– Nagkari ni sigud a Kapitana Marlina Tornada Montañez ti Parian Este, Bauang, La Union a tumulong iti pamilya ni Joel Mendoza para iti naan-anay a pannakaipaay ti hustisiya iti pannakapapatay ti mangisursuro idi Nobyembre uno.
Personal a nagturong ditoy broadcast center ti Bombo Radyo La Union ni Montañez tapno pagyamanan dagiti otoridad a nangasikaso iti kaso ni Joel ken iti pannaka-kemmeg iti agkasinsin, a makunkuna a suspek iti pammapatay.
Kinuna ni Montañez a saan da a mamati a maaramid ti biktima iti akusasyon dagiti suspek ngem pattien na nga adda iti sabali a motibo iti krimen, nangruna ket napukaw iti napapateg nga alikamen ni Joel idi mapasamak ti insidente.
Kagiddan daytoy, immapela ni Montañez kadagiti tattao a saan a nasayaat ti atap wenno panunot da kenni Joel, agsipudta matakderan na a ti nasao a mangisursuro ket addaan ti dignidad, nasingpet, ken responsable nangruna iti pamilyana.
Maipalagip a nasarakan ti maysa a mangngalap iti Pagdalagan Sur, Bauang iti naidasay a bangkay ti biktima iti igid ti baybay idi agsapa ti Nobyembre uno, 2020.
Base iti report, nagsagaba ti biktima iti 15 a tama ti bagsol, puon ti dagus a nakatayan daytoy.
Idi kalman ket naamwan ti Bombo Radyo kenni Maj. Jeofrey Sanchez, hepe ti Bauang Police Station, a natiliw dagiti agkasinsin a suspek iti nagsina a lugar, kalpasan a nabigbig dagitoy babaen iti naala ti pulisiya a kopya ti CCTV footages.
Ni Soriano ket adda ita iti custodiya ti Bauang PNP idinto a ti menor de edad ket temporaryo a naipasidong iti DSWD.
Kaso a robbery with homicide iti naidatag kontra kadagiti suspek.
