LA UNION – Tallo a mabigbig a politiko iti agbabalubal iti kina-kongresista ti maikaddua a distrito iti probinsya a La Union.
Iti maikaddua a gundaway ket sumabak manen iti congressional race ni incumbent Congresswoman Sandra Eriguel.
Ni Congresswoman Sandra ket biyuda ni sigud nga Agoo Mayor ken sigud a Representative Franny Eriguel a napapatay babaen ti pammaltog dagiti armado a lallaki kabayatan nga agbitbitla daytoy iti sango dagiti tattao sakbay ti barangay election idiay ilida.
Agkandidato met kas debotado iti maikaddua a distrito ni Tubao, La Union Mayor Dante Garcia iti umuna a gundaway.
Gandaten met ni retired General Tomas Dumpit Sr. a makasubli kas kongresman iti nasao a distrito.
Ni retired General Dumpit ket maysa kadagiti makunkuna nga asideg ken pagtaltalkan a military official ni sigund a Pangulo Ferdinand Marcos.
Nagsirbi met ti sigud a military official kas debotado iti maikaddua a distrito ti probinsya iti uneg ti maikatlo a termino.
Kabayatanna, maysa nga agnagan iti Teodoro Agaseta ti Naguilian, La Union iti nag-file met kandidatura iti nasao a posisyon ti distrito.
