Impaganetget dagiti nagpaam-ammo a 18 a sigud a miembro ti Philippine Marine Corps a dagiti nakapauneg ti sworn statements da sadiay Office of the Ombudsman ket pudno.
Karaman ditoy ti panangipatulod kadagiti minaleta a kwarta kenni sigud nga Ako Bicol Party-list Representative Zaldy Co, sigud nga Marikina 2nd District Rep. Stella Quimbo, ken agraman dagiti dadduma pay nga opisyales ti gobierno.
Iti pannakiuman kada Belnard Tube ken Benny Bulontate, agraman dagiti sigud a soldado ket impaganetget da iti testimonya a nangipatulod da a talaga kadagiti minaleta a kwarta kadagiti sigud a kongresista.
Kinunada a suportado dagiti ladawan ti testimonya ken impasiguro a kukua a talaga ni Quimbo ti balay.
Maibasar ti ‘joint-affidavit’, ket nakailanad a dagiti dadakkel a maleta ket naglaon ti nasurok-kumurang P50M agingga P70-M bayat a dagiti babassit met ket manipud P15M agingga P25M.
Ni Quimbo ket nagbalin a miembro ti naangay a bicameral conference committee ken nagserbi kas vice chairperson ti House Appropriations Committee iti napasamak a deliberasyon ti 2025 national budget.
