LA UNION – Naidatagen idiay prosecutor’s office ti agtutuon a kaso kontra iti sigud a municipal councilor ken iti 10 pay a kakadduana gapu ti maipagarup a multi-million pesos investment scam idiay Urdaneta City, Pangasinan.
Iti pannakiuman ti Bombo Radyo kenni Supt. Mary Crystal Peralta, spokesperson ti Police Regional Office-1 (PRO-1), kinunana a karaman da sigud a Sta. Barbara, Pangasinan Municipal Councilor Renato Gabiola ken ti live-in-na a ni Sharmaine Junio Castillo alyas Shamee ti Bayambang, Pangasinan a maipagarup a mastermind ti scam iti nakaswanen idiay piskalya.
Maipagarup nga ar-aramaten ti nasao a grupo iti modus ti social media tapno makaallukoy kadagiti miyembro wenno investors, ken mangidiaydiaya iti 50 percent a ganansya a maala iti uneg ti pito agingga 10 nga aldaw kada miyembro ti C and G Dry Goods nga aglaklako iti ukay-ukay.
Malaksid iti ag-live in, karaman kadagiti nakaswan nga empleyado nga immunan a naaresto ket isuda May Ann Lanoza ti Manaoag; Cristine Collin Martin ti Laoac; Camille Cyree dela Cruz ti San Nicolas; Haidee Marie Andrada Ramos ken Hannah Cristina Marquez ti Urdaneta City; Janic Etoria Daluzong ti Dagupan City, Pangasinan; ken Rochelle Basing-at Pangilinan ti Baguio City.
Agtaltalinaed nga at-large ti sigud nga opisyal ken ni Castillo, karaman ti maysa pay nga empleyado a ni Chen Joy Garcia Nelvis ti La Union.
Saan pay a makaipaay iti agdama kinunana iti data ti pulisya iti eksakto a bilang dagiti nabiktima ken iti balor ti naitaray a kwarta a naitaray gapu ta agtultuloy pay laeng nga agparparang dagiti mangidatdatag iti reklamo idiay Urdaneta Police Station.
Kaso a syndicated and large scale estafa, ken panaglabsing iti Anti-cyber Crime Law ti sangsanguen a reklamo dagiti suspek.
Immuna iti daytoy, kinuna iti dadduma nga investors a nakauman ti Bombo Radyo a maipagarup nga umabot iti 1,000 ti nabiktima karaman ti sumagmamano nga overseases Filipino workers (OFWs), ken nasurok a P60 million iti naitaray a naipuunan a kwarta ti nadakamat a bogus nga investment firm.
