Nupay siguden a mangmangngegan na iti Davao Death Squad (DDS), inlawlawag ni dati a Philippine Drug Enforcement Agency (PDEA) Director General Wilkins Villanueva nga awan unay ti impormasionna maipapan iti kontrobersial a grupo.
Kabayatan ti panagparang ni Villanueva iti maikasangapulo a House Quad Committee hearing, dinamag ni Zambales 1st District Representative Jeff Konghoun iti dati a hepe ti PDEA no adda ammona maipapan iti kontrobersial a DDS.
Insungbat ni Villanueva a nupay naidestino isuna iti Region XI bayat ti naud-udi a paset ti termino ni Duterte, saan laeng a ti Davao City ti nagpokusan na nga isu met iti nagturayan ti pamilia Duterte.
Kinunana, ti laeng DDS ti nangngggan na ngem saan pay a naaddaan iti gundaway a makasango iti kastoy a grupo.
Ipapilit ni Villanueva a gapu ta dandani inaldaw a mangngegan da sadiay, naibilangen dayta kas general information, uray no awan ti kinapaysuanan na.
Dinamag met ni Congressman Konghoun ken ni Villanueva no ania ti maibagana maipapan iti nasaknap a war on drugs ti dati a PRRD.
Iti sungbat ti dati a nadutokan ni Duterte, malaksid kadagiti kaso ti extrajudicial killings, dakkel ti epekto ti gubat kontra droga, nangruna no maibasar iti programa ti Barangay Drug Clearing.
Maipalagip nga idi Mayo-28 tawen 2020 idi nagsapata ni Villanueva kas Director General ti PDEA, nagtultuloy agingga iti panagtakem ni Presidente Ferdinand Marcos Junior ngem sinukatan ni Undersecretary Moro Virgilio Lazo idi agangay.
Ni Lazo ket maysa a retired general manipud iti PNP Special Action Force.
