BR LA UNION – Addan iti kustodiya ti International Criminal Court (ICC) idiay The Hague, Netherlands ni sigud a President Rodrigo Duterte.
Daytoy ket sumagmamano nga oras kalpasan a nagdisso ti eroplano a naglugananna agarop alas 11:55 ti rabii ti Miyerkoles, oras ditoy Pilipinas.
Iti statement nga inruar ti ICC, iggem dan ti sigud a presidente kalpasan nga inaresto dagiti otoridad ti pagilian gapu iti nadara a kampanya na kontra illegal a droga.
Maipalagip nga idi Pebrero 2025 a nag-apply ti Office of the Prosecutor ti ICC iti arrest warrant kontra iti sigud a Presidente gapu iti crime against humanity of murder, torture ken rape.
Iti chamber a buklen da Presiding Judge Iulia Antoanella Motoc ken isuda: Judges Reine Adélaïde Sophie Alapini-Gansou ken María del Socorro Flores Liera ti nangidaulo iti panangadal kadagiti dokumento nga insumite ti prosekusyon.
Napaneknekan ken nakakita iti nadagsen nga ebidensiya a ti sigud a Presidente ket responsable kas indirect co-perpetrator iti crime against humanity of murder a naaramid ditoy pagilian manipud Nobiembre 1, 2011 agingga iti Marso 16, 2019.
Nakagun-od da pay ti ebidensiya, nga indaulwan ni sigud a Presidente Duterte ti Davao Death Squad (DDS) a nagresulta iti pannakatay dagiti ribu a residente.
Kalpasan a naipa-ima iti ICC ti sigud a presidente, mangituding dan iti hearing para iti umuna a panagparangna iti korte.
Iti nadakamat a hearing, kumpirmaren ti Kamara iti pakabigbigan ni Duterte ken anya ti tarigagayanna a panagsao wenno lengguahe a kayatna nga usaren iti hearing.
Patien pay ti chamber a naawatan ti sigud a Presidente iti krimen a maipagarop nga inaramidna ken iti karbengan na iti sidong ti Rome Statue nga isuti founding treaty ti korte.
Nagyaman ni ICC Registrar Osvaldo Zavala kadagiti otoridad ti Pilipinas iti pannakaipatungpal ti international accountability mechanism ken ti koordinasyon da iti The Netherlands.
Immuna ti daytoy, sumagmamano nga oras sakbay ti panagdisso ti flight RP-C5219, nangiruar ti sigud a presidente iti video message ket impasiguro na iti publiko a nasayaat ti kasasaadna ken sangwen na dagiti darum maibusor kenkuana.
