Pormalen a napilaan ti kaso a cyber-liber iti Manila Regional Trial Court ni sigud a Representative Francisco “Kiko” Barzaga, maibasar iti reklamo nga inpila ni Manila 2nd District Rep. Roland Valeriano.
Nagtaud ti kaso iti mapapati a social media post ni Barzaga a mangak-akusar kadagiti kameng ti National Unity Party (NUP) nga umaw-awat iti pasuksok manipud iti negosiante a ni Enrique Razon kasukat ti suporta idi kenni Leyte 1st District Rep. Martin Romualdez tapno agbalin nga House Speaker.
Nainget nga inlibak ni Rep. Valeriano iti pammabasol ket tinakderan na nga awan ti inawatna nga aniaman a gatad.
Maibasar iti impormasyon a naipila iti korte, nakasuan ni Barzaga ti panaglabsing iti Republic Act No. 10175 wenno Cybercrime Prevention Act of 2012, mainaig iti Articles 353 ken 355 ti Revised Penal Code. Nakailanad met a panggep ti online post a dadaelen iti reputasion ni Rep. Valeriano.
Maibasar iti nagbalin a preliminary investigation, kenuna ti Manila City Prosecutors Office nga adda ti prima facie evidence ken reasonable certainty of conviction maibusor kenni Barzaga. Nairekomenda ti ₱10,000 a piyansa para iti temporario a wayawayana.
Silulukat ti Bombo Radyo Philippines iti aniaman a statement wenno depensa ni Ex-Rep. Barzaga mainaig iti kaso a naipila kontra kenkuana.###
