LA UNION – Panagbalin a natured, natibker, ken talek iti Diyos iti nagsadagan ni Jon Jon Medriano tapno maartapan na iti patay wenno pannakaisagmak ti biag na idi naitawtaw daytoy iti kabaybayan a gapwanan ti saan a nasayaat ti kasasaad ti panawen.
Iti eksklusibo nga interview ti Bombo Radyo La Union kenni Medriano, inistorya na iti inaramid na a wagas tapno maka-survive iti dimteng a pannubok ti biag daytoy.
Kinuna na nga inaramid na amin a kabaelan na tapno ag-survive, nangan ti aragan, imminom ti danum iti baybay tapno agbiag iti sumagmamano nga aldaw a panagtalinaed na iti kabaybayan.
Kinuna na a saan a napukawan ti namnama ken pammati iti Diyos a makalasat daytoy manipud iti pannakalned ti bangka na iti kabaybayan.
Kawayan nga addaan ti styrofoam ti nagpatawan wenno nagkaptan ti 23-anyos a mangngalap kabayatan ti kaadda na idiay taaw iti nasurok 3 nga aldaw sakbay a nasarakan daytoy ti maysa a residente a ni MR. FERDINAND TADIJE iti igid ti baybay idiay Brgy. Paraoir, Balaoan, La Union alas-6:00 idi rabii ti Miyerkoles.
Nangpapigsa pay iti determinasyon na nga ag-survive ket iti dua a tawen pay laeng nga anak daytoy.
Ngem iti laksid ti napasamak kenkuana, determinado latta daytoy nga itultuloy na ti mapan agkalap iti kabaybayan, agsipudta daytoy iti kangrunaan a pagbirokan na, tapno mabiag ti bukod na a pamilya.
