LA UNION – Nangipatungpal ti online wenno asynchronus classes iti Don Mariano Marcos Memorial State University (DMMMSU) mangrugi ita nga aldaw ti lunes, Abril 29 aginggat Mayo 04, 2024.
Kayat a sawen daytoy nga awan ti face-to-face classes iti DMMMSU kadagiti nasao nga aldaw.
Maibasar iti waragawag ti unibersidad, gapu iti nangato a heat index.
Tarigagay ti unibersidad iti impatungpal na nga asynchronus classes tapno masalwadan ti salun-at dagiti agad-adal ken mangisursuro kontra iti nakaru a kinabara ti tiyempo.
Sumagmamano itan nga aldaw ken lawas a nangato iti temperatura a marikrikna ditoy probinsiya ti La Union partikular ditoy siyudad ti San Fernando, a duman-danon iti 42 agingga 45 a tukad ti sentigrado.
Maipalagip nga immunan nga impatungpal ti liderato ti nasao a pagadalan iti panang-suspinde ti panagsuot ti uniform dagiti teachers ken estudiyante, tapno agbalin da a komportable iti panagisuro ken panagadal dagitoy iti laksid ti kinabara ti panawen, a gapwanan ti epekto ti El Nino Phenomenon.
Idi kalman, aldaw ti Domingo, dimmanon ti temperatura ditoy siyudad ti agingga 47 degrees celsius a maibilang iti danger category ti PAGASA-DOST.
